17 February, 2007

المفكر الاسلامي عبــده كفـــته


عبده كفته : بقلك ايه يا زبدة انا جتلي حتة فكرة ممكن تخلينا مشهورين ومعانا فلوس كتير بدل ما احنا ملناش لازمة ومش لاقيين شغل.
عبدة زبده: ايه يا كفتة هننهب بنك وتتنشر صورنا في الجرايد؟؟
عبده كفته:لا طبعا ....... احنا هنشتغل مفكرين اسلاميين
عبده زبدة:مفكرين ايه؟؟؟ انت كافر.... ولا عمرك صليت
عبدة كفته: يعني انت اللي بتصلي؟؟؟ انا بقلك مفكر مش مفتي
عبده زبدة: انا مش فاهم ممكن تفهمني اكتر؟؟؟
عبده كفتة: يعني نشتري كام كتاب ونعمل مكتبه في البيت ونقول اننا مفكرين اسلاميين
عبده زبدة: وبعدين؟؟؟
عبده كفتة: نشوفلنا اي صحفي درجة عاشرة ونقوله اننا بعد ما درسنا وتفقهنا - جامده تفقهنا دي - وصلنا لان لا الظهر ولا العصر 4 ركعات والمغرب مش 3 والفجر مش اتنين ولا العشاء اربعه يعني ننوع في عدد الركعات
عبده زبدة: وهنستفيد ايه؟؟؟
عبده كفته:البرامج والجرايد بقا هتجيبنا وهناخد فلوس ونبقى مشاهير...مش بعيد نطلع في هاله شو
عبده زبده: فهمتااااااااك ..... عارف احنا كمان ممكن نقول اللبان والمصاصات متفطرش... مدام في مفكر قبلينا قال ان السجاير متفطرش
عبده كفته: والمصري اليوم تعملي عمود (انت تسال ...وعبده كفته يجيب
عبده زبده: ولو اترفعت علينا قضيه ؟؟؟؟
عبده كفته: هولندا تبعتلنا ونروح نبقا دكاترة في الجامعه ناخدلنا ماجستير ودكتوراه في اسبوعين
عبده زبده:طيب لو حد زنقنا واثبتلنا ان عدد الركعات صح؟؟؟
عبده كفته: نقوله يجيب دليل من القران او الاحاديث بعدد الركعات ولو حبكها معانا اوي نقوله يشغل عقله شوية ويسيبه من التحجر.
عبده زبده : ونقول كمان انه احنا اجتهدنا في حاجة لم يرد فيها نص زي المصاصات واللبان
عبده كفته: برافو عليك...بدأت تفكرأهو .... يلا بينا نبقى مفكرين اسلاميين؟؟؟؟
عبده زبده: يلا بينا

02 February, 2007

انت حمار يا حمار؟


داروين جه فى يوم من الايام وقال أن الانسان أصله قرد وأطلق على الكلام ده أسم نظريه التطور..بس السؤال هل الانسان هيتطور ويتغير لحاجه تانيه غير أنسان ؟؟على العموم هسيبكم تفكرو ا لانسان هيتطور لأيه بالظبط....نتيجه التطور الكبير الذى يحدث فى الجنيه المصرى والدولار الامريكى والاسعار فى السوق والغش التجارى من أول بيع لحم الحمير على أنه لحم صالح للاستخدام االادمى وياريت نحط عشر خطوط تحت غش اللحمه...المهم ظهرت نظريه جديده شبه نظريه داروين بتاع التطوروبتقول أن الانسان أصله حمار أول ما الانسان سمع الكلام ده ثار ورفض ونبذ وشجب وما الى أخره من الكلام بتاع المؤتمرات العربيه بتاعت السلام والارهاب (أو المؤامرات بمعني أصح)ودى بيعملوها لما تكون فيه مذبحه فى القدس أو العراق والنهايه أنتم عارفينها أكتر منى بصفتى لسه حصاوى صغير يعنى الحمد لله مش بتلو وألا كنت أندبحت العيد الى فات..

المهم مش دى مشكلتنا...أحنا عايزين نسمع رأى الحمار ورده على كلام الانسان فى الوضوع ده... فى ضوء فهمنا لفلسفه الحمار.و طبعا .فلسفه الحمار دى كلمه أنا كتير جدا بحس أن هى شىء حقيقى مش مجرد هرتله وأن الحمار بيخطط ويتكتك ويضع أستراتيجيات للحروب ولكن ولابد أن وراء صمت الحمير شي مخيف يشبه هدوء ما قبل العاصفه ...السؤال الذى يطرح نفسه على الساحه الان كيف ستكون عاصفه الحمير؟؟يعنى أمتى يقولو لأ والف لأ؟؟يعنى محدش جاوب مع أن الاجابه محتاجه لدكتور بيطرى متخصص بس أنا هجاوب بما أنى أيام ثانوي كنت بتلو يعنى لسه صغير.. شوفو يا جماعه قبل ما الحمار يقول لا لازم يبطل ينهق ذى الحمار و يقول أى حاجه تانيه يعني مثلا يقول (جو تو هيل) أو (ماي هارت ويل جو أون) وده مش هيحصل الا اذا تطور جهاز النطق عند الحمار...وده برضو مش هيحصل الااذا غير فى نوعيه طعامه ...يعنى ياكل جاتوه يعنى الحمار لو أكل جاتوه ممكن ياكل لحمه ودى هتكون أول مسمار فى نعش الحماربس يا ترى هل الحمار حمار وغبى لدرجه أنه يعمل كده ؟؟؟

ويبقى السؤال الازلى الذى نوجهه لكل حمارأنت حمار يا حمار؟؟؟

اخــــتـــرنا لــــــــــــك




اخترنا لك مثل الموت ..كلاهما مكتوب علينا...وكلاهما لافرار منه واذا كان الموت هو الحقيقه الوحيده المطلقه في الحياه...فان اخترنا لك هو المصيبه الوحيده المطلقه في التليفزيون،والذي ينط في ليالينا المسكونه بالرطوبه والزهق مثل الغراب المنحوس،ولا أحد يعرف سر جبروت وسطوة هذا الداهيه،هل هي تابعه مباشره لعزرائيل،أم يعمل تحت حماية ووصاية حلف الناتو،لكن الحقيقه المؤكده،أنه أصبح مثل البلطجيه الذين يطيحون في الزبون،اذا لم يقبّل الارجل الكريمه...ويدفع الاتاوه أو الفرده ورجله فوق رقبته ولنتأمل مثلا احدي الحلقات لنعرف ان الله اذا احب عبداً أماته مستوراً دون ان يري هذه الفضيحه،أما اذا غضب عليه سلط عليه البرنامج ليأكل عقله،فيصبح مثل جنون البقر..

بعد الصلاه علي النبي العدنان وبعد كتابة اسامي المكوجيه والحلاقين والسباكين والاستورجيه،والداده والبلانه وام احمد الماشطه وام سمير بياعة الفراخ وام عبير الدايه،يقدم لنا المخرج صورة كشاف الاضاءه وهو يضىء وينطفىء لنري عجائب الله في خلقه،ولنحمد الله ونشكر فضله علي اننا نفدنا بجلدنا من عصر لمبة الجاز والزلطتين....وقبل أن نري المذيعه والتي لا يمكن رؤيتها بهذه السهوله بالطبع، ويابخت من تملي بنورها في المنام...تتجول الكاميرا داخل الاستوديو..حيث الزرع الصناعي والذي ينتشر الان في بيوت الاسطوات والعربجيه..ثم يبخ المخرج بخّة دخان جامده جدا من باب الابهار،وكأنهم يقيمون حفلة زار لاخراج العفاريت والجن

.وبعد عذاب الانتظار والقعده علي نار تخرج علينا الست المذيعه..ولا خرجة المحمل في زمانه..وفي يدها الميكروفون كأنه كوز ذره...وتظل صامته عدة دقائق لزوم التشويق...ثم تتنهد وتتأود وتضحك...وتميل برأسها ذات اليمين وذات الشمال وكأنها تتأكد ان اخواتنا -بسم الله الرحمن الرحيم- حاضرين ومبسوطين...أو لانها تعاني من مرض ما لا سمح الله..وتقول بصوت نعسان
"احنا متشكرين قوي يا كماعه علي التليفونات الكتشيره اللي بتشجر البرنامج،لدرجة اننا مبنعرفش لا ناكل ولا نشرب ولا ننام...جتكم مصيبه عالم جبلات صحيح"تزداد ابتسامتها اتساعا وتضيف:"والظاهر انكم ما بتحسوش علي دمكم ،لان اللي يستحمل برنامج زي ده يبقي معندوش دم...المهم...هانقدملكم دلوقت فقرة الكاميرا الخفيهالجميله العبقريه واللي حاولنا نقدمهالكم هنا في مصر لكن النقاد الوحشين اللي باصينلنا في اللقمه زعلوا وهاجموا البرنامج منتو عارفين انهم قطاعين أرزاق وغلاويين

وتتحرك الكاميرا الي كشاف الاضاءه الذي ركبته العفاريت،ثم نفاجأ بفقره معاده للمره ال20 ، لا تستغرق اكثر من 5 دقائق،مع ان المذيعه قدمتها في ربع ساعه، ثم اعلانات عن الحمامات والفوط الصحيه والزيت والسمنه وخلافه لمدة 10 دقائق....وتعود الكاميرا الي ضريح الحاج كشاف لتأخذ منه البركه...وليأخذ عين الحاقدين والحاسدين بدلاً من القر علي الست المذيعه...والتي تتنهد وتبتسم وتقول

"ودلوقت يا جماعه هانقدم ليكم فقرة عن ميكي ماوس الشقي العفريت اللي كلكم بتحبوه ...ما انتو عيال وتموتوا في الهيافه...وعشان كده اخترنالك الفقره اللي تجنن دي..واللي هاتخلص عليكم...واللي معندوش دم ورزل ومصــــّر انه يكمل البرنامج...عندنا برضو اللي ارزل منه ويجيبه الأرض.....وعلي فكره...جتلنا مكالمات تليفونيه كتيره بتسأل علي الحلقه الاجنبيه...وعشان تبطلوا زن هانخليها مفاجأه ومش هنقولكم انا أكس فايلز...جتكم داهيه
.
في النهايه:أرجو ان يتبع البرنامج مصلحة السجون أو تنظيم الأسره ويتم تغيير اسمه من (اخترنا لك) ال (نعكنن علي أهلك)..وللحديث
بقيه
..